ദോഹ: മുശൈരിബ് ഡൗൺടൗൺ ദോഹയുടെ ഹൃദയഭാഗത്തുള്ള ക്രിയേറ്റീവ് ഹബ്ബായ ദോഹ ഡിസൈൻ ഡിസ്ട്രിക്റ്റ് (DDD), സർഗ്ഗാത്മക കൂട്ടായ്മകളെ പിന്തുണയ്ക്കുന്നതിനായി 'മദ ആൻഡ് സദ' (Mada and Sada) എന്ന പുതിയ പ്ലാറ്റ്‌ഫോം ആരംഭിച്ചു. ഒരു കലാസൃഷ്ടിയുടെ ആദ്യ ആശയം രൂപപ്പെടുന്നത് മുതൽ അത് പൊതുസമൂഹത്തിന് മുന്നിലെത്തുന്നത് വരെയുള്ള സമ്പൂർണ്ണ യാത്രയെ അനുഭവിച്ചറിയാൻ സഹായിക്കുന്ന ഒരു സവിശേഷ പ്ലാറ്റ്‌ഫോമാണിത്.
​ഇതിന്റെ ഭാഗമായി ശിൽപ്പശാലകൾ, പ്രദർശനങ്ങൾ, വിവിധ മേഖലകളിലുള്ളവരുടെ കൂട്ടായ സഹകരണത്തോടെയുള്ള പരിപാടികൾ എന്നിവ തുടർച്ചയായി സംഘടിപ്പിക്കും. വളർന്നുവരുന്ന കലാകാരന്മാർക്കും പ്രശസ്തരായ പ്രതിഭകൾക്കും ഒരുപോലെ പ്രയോജനപ്പെടുന്ന രീതിയിലാണ് ഈ പ്ലാറ്റ്‌ഫോം രൂപകൽപ്പന ചെയ്തിരിക്കുന്നത്. സൃഷ്ടിപരമായ പ്രക്രിയകളും പൊതുജന പങ്കാളിത്തവും തമ്മിലുള്ള അകലം കുറയ്ക്കുകയാണ് ഇതിലൂടെ ലക്ഷ്യമിടുന്നത്.ഡിസൈനർമാരും കലാകാരന്മാരും ദോഹയിലെ സാംസ്‌കാരിക പ്രവർത്തകരും പങ്കെടുത്ത പ്രൗഢഗംഭീരമായ ചടങ്ങിൽ, അന്താരാഷ്ട്രതലത്തിൽ ശ്രദ്ധേയയായ ഖത്തറി സംഗീതസംവിധായികയും ഗായികയുമായ ദാന അൽ ഫർദാന്റെ 'മുശൈരിബ് സിംഫണി'യോടെയാണ് പ്ലാറ്റ്‌ഫോമിന്റെ ഉദ്ഘാടനം കുറിച്ചത്.
​കലാകാരന്മാർക്ക് പരീക്ഷണങ്ങൾ നടത്താനും പരസ്പരം ബന്ധപ്പെടാനും അവരുടെ ആശയങ്ങൾക്ക് ജീവൻ നൽകാനും കഴിയുന്ന ഒരു മികച്ച ഇടമാണ് ഇതിലൂടെ ഒരുങ്ങുന്നതെന്ന് ദോഹ ഡിസൈൻ ഡിസ്ട്രിക്റ്റ് ഡയറക്ടർ ദാന കാസിക് പ്രസ്താവിച്ചു. പ്രാദേശികവും അന്തർദ്ദേശീയവുമായ സാംസ്‌കാരിക വ്യവസ്ഥിതിക്ക് ഇത് വലിയ സംഭാവന നൽകുമെന്നും അവർ കൂട്ടിച്ചേർത്തു.ഉദ്ഘാടന ചടങ്ങിന്റെ ഭാഗമായി, അന്താരാഷ്ട്ര പ്രശസ്തിയാർജ്ജിച്ച ഡിസൈൻ സ്റ്റുഡിയോ ആയ 'പെന്റാഗ്രാമി'ന്റെ ക്രിയേറ്റീവ് ഡയറക്ടർ സമർ മാകറൂണിന്റെ നേതൃത്വത്തിൽ പ്രത്യേക സെഷൻ സംഘടിപ്പിച്ചു. 'മദ ആൻഡ് സദ'യുടെ വിഷ്വൽ ഐഡന്റിറ്റി രൂപകൽപ്പന ചെയ്തത് സമർ മാകറൂൺ ആണ്.
​ഒരു സ്ഥാപനത്തിന്റെ കഥകളും മൂല്യങ്ങളും ലക്ഷ്യങ്ങളും എങ്ങനെ ദൃശ്യ-ശ്രാവ്യ മാധ്യമങ്ങളിലൂടെ ജനങ്ങളിലേക്ക് എത്തിക്കാമെന്നും, ഒരു ഓർഗനൈസേഷന്റെ പ്രതിച്ഛായ രൂപപ്പെടുത്തുന്നതിൽ ബ്രാൻഡ് ഐഡന്റിറ്റിയുടെ തന്ത്രപരമായ പങ്ക് എന്താണെന്നും സെഷനിൽ വിശദമായി ചർച്ച ചെയ്തു.